JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Nasaun Presiza Forsa GAM Tulun Estado

Nasaun Presiza Forsa GAM Tulun Estado

Opiniaun neé la reprejenta instituisaun neébe haknaár áan ba, maibe nuúdar opiniaun pesoal, hodi espresaun nuúdar sidadaun, tuir artigu 41 Liberdade espresaun konstitusisaun RDTL.
Liga ba tópiku iha leten kona-ba “Nasaun presija forsa GAM tulun Estado” Hau hakarak klarifika katak, filosófia Grupu Arte Marsiais (GAM) laos atu kria konflitus no halo inimigu ba malu, maibe inklina áan iha Grupu Arte Marsiais sai maun-alin, ba família da-ruak nian. Treinu iha GAM atu hasae forsa fíziku, no imunidade isin loloós, eduka atu ba dalan loós, iha vída espíritualidade, Edukasaun sívika, no ajuda malu wainhira membru seluk hetan susar no terus. Filosófia ida neé sai nuúdar matadalan hafoin prezensa GAM iha sosiedade konsidera importante tebes.

Iha Timor Leste, prezensa Grupu Arte Marsiais (GAM) desde tempu Portuguesa, iha neébe Avo sira treinu fíziku, ho objetivu atu defende áan, no hadia kondisaun saúde. Iha toó okupasaun Indonezia, Timor-oan sira uza GAM hodi halaó klandestina, servisu hamutuk ho FALINTIL sira iha ai-laran, toó period Ukun Rasik Áan, sidadaun sira kontinua tuir treinu fíziku, maibe la sees husi filosófia GAM nian.

Iha loron 2 fulan Jullu tinan 2013, desizaun Konsellu Ministru estraordinária, hasai rejolusaun Governu númeru 16/2013 kona-ba estinsaun Grupu Arte Marsiais, no determina estinsaun ba Grupu Persaudaraan Setia Hati Terate (PSHT), Ikatan Keluarga Silat (IKS) PTL Kera Sakti Timor Leste no Kmanek Oan Rai Klaran (KORK), hodi bandu total kontinuasaun ba kualker aktividade. Iha rejolusaun neé mos define medida lubun atu bele estabelese hikas fali órdem públika no hakmatek iha sosiedade nia leét, tamba hetan ameasa husi aktus criminal neébe membru grupu hirak neé halo.

Durante rejolusaun Governu aplika, númeru membru GAM kontinua aumenta, liu husi graduasaun. Tuir informasaun husi membru GAM, kuandu remata graduasaun, la iha lia-menon ida ba membru foun sira atu hamosu inimigu ba malu, ka kria konflitus, maibe husu atu respeita malu, fiar malu, kria Paz no estabilidade, no kumpri Regras Estado neébe estabelese, maibe konflitus neébe akontese husi membru GAM sira, konsidera nuúdar problema individual.
Durante neé públiku kestiona no julga katak GAM sira nuúdar Organizaun criminal, tamba membru sira atake malu, kria konflitus, no oho malu. Públiku prega lia-fuan oi-oin ba GAM, tamba deit oknum sira nia aktus, Organizasaun mak hulan no tutur iha kabas. Maske nuneé, iha membru GAM barak mak moris tuir dalan Filosófia GAM nian, hodi halaó aktividade moris loron-loron.

Hahuú husi Kinta-Feira loron 08 fulan Abril tinan 2021, desizaun Secretária Estado Juventude no Desportu no Komisaun Regulador Arte Marsiais (KRAM) bolu líder GAM husi PSHT, IKS PTL Kera Sakti no KORK atu orienta ninia membru sira, hodi ajuda nasaun hafoin kalamidade akontese iha Domingo loron 05 fulan Abril tinan 2021.
Orientasaun toó dunik iha membru GAM tolu neé nia tilun, no nuúdar membru GAM, pronto hodi apoiu Estado, tamba Nasaun lakon ona nia emar, estragus total ba uma komunidade no seluk. Tempu ohin laos ona tempu konflitus, bolu malu nuúdar maun ho alin, nuúdar Timor-oan, Kultura ida deit, maske diferente kor GAM. Nasaun tanis, mataweén turuk husi Foho toó tasi, husi Rai Ulun toó Rai ikun, tasi neébe moós nakfila sai merak, tamba neé Nasaun presija nia emar sira, liu-liu Juventude sira iha GAM atu tulun família vítima ba kalamidade neébe akontese foin lalais neé.

Depois hahuú Kinta-Feira limpeza geral lao, husi membru GAM (PSHT, IKS PTL Kera Sakti no KORK) inklui Arte Ritual 7-7, julgamentu públiku iha mídia sosial, bisu-bisu iha tilun husi sidadaun sira iha knua ida-idak, halo joven sira fuan hakmatek, laran kontenti, tamba públiku husu membru GAM kria paz no unidade, hamnasa ba malu, no soe ona odio-vingansa, hodi tulun Nasaun.

Tuir informasaun, Limpeza públiku husi membru GAM iha capital Dili, durante loron 10 neébe hahuú ona husi Kinta-Feira loron loron 08 fulan Abril tinan 2021, neébe sei termina iha Domingo loron 18 fulan Abril tinan neé, hanesan teste ida, atu tetu no sukat membru GAM sira nia konsiensia apoiu Nasaun, duke kria Kria Konflitus. Wainhira membru sira husi GAM kria konflitus durante loron neébe determina, Governu sei deside taka total ejistensia GAM, parese toó rohan laek, tamba oportunidade mai dala ida deit, sei la mai bebeik. Tamba neé membru GAM tomak, tenke kria nafatin Paz no estabilidade, soe odio-vingansa nuneé sosiedade no públiku bele tau konfiansa katak, membru julgamentu públiku ba membru GAM sira kona-ba kriminoju, la hanesan ho realidade neébe iha. Realidade neébe hatudu mak membru GAM sai Joven, no sidadaun neébe diak hadomi nia Nasaun toó Rohan laek.

Ohin membru GAM halaó limpeza iha famía afeita Inundasaun, hatudu duni solidáriu ba malu, hamnasa ba malu, halaó servisu hamutuk, nuúdar prosesu ida atu hakat ba oin nafatin.

Parabéns ba Juventude Timor Leste.

Parabéns ba Grupu PSHT, IKS PTL Kera Sakti Timor Leste, KORK, Arte Ritual 7-7. Nasaun presija duni ita boot sira nia tulun, tamba neé hader ona ba, kontribui ba, tuir ita boot sira nia filosófia Organismu, nuneé hametin korenti amizade nian, atu sai Organizasaun Arte Marsiais Organizadu, Mobilizadu no Edukadu iha sosiedade nia leét. Tebes duni “Nasaun presiza forsa Gruou Arte Marsiais (GAM) tulun Estado.

Tamba sá mak hau dehan nuné, tamba Nasaun nia Órgaun Estado sira hadomi Joven sira atu promove talent fíziku, nuneé Governu deside hasai rejolusaun, kona-ba Revogasaun Rejolusaun Governu númeru 16/2013 10 Jullu, neébe bandu Grupu Arte Marsias (GAM) halaó aktividade. Ida neé sinal naroman ba GAM hotu, tamba neé aproveita oportunidade, hanesan Hau sita antes iha paragrafu leten. Obrigado Wain. REMATA

Hakerek Naín: Amito Qonusere Araújo, Jornalista RTTL, númeru konktu +(670)77639282, E-mail amitortl@gmail.com, hela iha Aldeia Tchai, Suco Lore I Postu Lospalos-Laútem.

Add to Comments Here!!!!

error: Content is protected !!