Dili – Eis traballador saneamentu postu Cristu Rei nain 18 hato’o lamentasaun ba Parlamentu Nasional tanba autoridade munisipio Dili hapara sira nia servisu.
Eis traballadora Arina Amaral esplika, administrador postu Cristu Rei hapara kontratu traballador nain 18 hodi substitui ho nia familia rasik ba servisu iha saneamentu postu Cristu Rei.
Traballadora ne’e husu Parlamentu Nasional atu apresenta lamentasaun hirak ne’e ba governu hodi buka solusaun.
Traballadores hirak ne’ebe administrador postu hapara nia kontratu ne’e, depende deit ba servisu saneamentu hamos foer iha valeta laran ne’ebe governu anterior fo kontratu ba sira.
Sorin seluk, traballadora Irene Madeira preokupa ho governu nia sistema ne’ebe la benefisia povu.
Relasiona ho ne’e, presidente komisaun A ba asunto lei no justisa, Joaquin Dos Santos kompromete, sei komunika ho ministro administrasaun estatal hodi buka solusaun ba eis traballadora hirak ne’ebe termina sira nia kontratu.
Entretanto; traballador hirak ne’e autoridade munisipio Dili halo kontratu ba sira ho termu sertu, hamutuk 50 hanesan saneamentu hodi hamos foer sira ne’ebe nakonu iha valeta.
(Alau)
