JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Udan-Ween Nakfila Sai Mata-Ween

Udan-Ween Nakfila Sai Mata-Ween

Dili – Kalan ne’ebá, la iha fulan nia roman, la iha mós fitun nia nabilan, kalohan falun metin. Fulan no fitun nia roman ki’ik, kbiit laek hodi leno borus kalohan metan nia falun.

Loron sábadu, kalan fahe rua, kalohan metan kalan nian, nabeen turu tun, sai udan-been hodi habokon uma kakuluk no ai-horis iha rai. Udan ki’ik nia taturuk tempu ne’ebá, halo ema hotu nia toba furak no hakmatek tebes.

Loron ne’ebá, loron sábadu, 04/04/21. Loron ne’e hanesan loron moruk ba sira be lakon ema, lakon but hotu-hotu. Loron ne’e hakat liu ona, sei la fila tan, maibé kanek nia fitar iha loron ne’ebá sei labele hamoos.

Udan ki’ik nakfila sai boot liu tan, kadalak husi foho lolon haleu Dili sai ona mota. Mota hahú sobu uma. Uma sira be harii iha foho hun, rai halai hodi taka uma no ema nia isin.

Emar barak hakfodak ona husi nia mehi. Hafoin hakfodak husi mehi, balun tanis buka família ne’ebé lakon tanba mota lori no rai hanehan.

“koitadu….ha’u nia oan ba ne’ebé….aiiii…Na’i…ha’u nia oan lakon” balun seluk hakilar “aiii…iha ne’ebá rai taka tomak uma ne’e…..” lian hakilar no halerik ne’e sai husi família nia ibun hodi halai ba mai buka ema ne’ebé sira hadomi.

Oan kiik koan salan laek iha inan nia hakuak, be sulin hodi hadau lori ba tasi, rai monu hanehan, mate, la iha lian, rate mós laek.

Iha tuku hitu dadeer, sidade Dili nakfila sai mota boot, kadalak nakfila sai mota no mota nakfila an ba tasi.

Estrada públika nakonu ho Bee, emar sira nia uma nakonu ho tahu dodok, uma na’in sira tenke halai ba fatin dook hodi hadau moris.

Domingu dadeer-san, kalohan la fó fatin ba loron matan, udan nafatin turuk, mota nafatin sulin, rai nafatin halai.

Lagoa Tasi-tolu, iha tempu bai loron, tasi haketak an ba fatin tolu.  Maibé iha tempu udan, Tasi-tolu nakfila sai ba ida de’it.

Emar sira kbiit laek hodi satan netik natureza nia forsa. Emar sira tuur hateke hodi hamonu matan-been. Ema barak ho tanis, hateke tuir sasán no ema ne’ebé sira hadomi mota lori.

“Ami nia sasán iha uma laran ne’e kuaze at hotu, ami nia kareta Bee hoban hotu, ami labele halo buat ida” dehan Vítima, Fausminu da Silva Gomes, bairo besi mean Tasi-tolu.

 Hafoin inundasaun, ekipa husi governu rejista ona adus, maibé Faustino hatete, “to’o agora governu seidauk fó apoiu ruma, indivíduu mak fó apoiu”.

            Emar sira iha Lagoa Tasi-tolu ninin la iha ona dalan atu sai husi uma ba fatin maran. Estrada diresaun Terminal ba Maslidun sei nakonu ho Bee, kuaze metru ualu, nune’e karreta no motor labele halo movimentu, tenke uza bero ki’ik. Bero ki’ik husi peskadór nudár alternativa hodi hakur tasi-been.

“Sa’e Bero mak bele ba. Ema ida selu dua-dolar, tula sasán entaun lima-dolar ” Mateus da Silva, fó sasin.

Sira be iha osan, sa’e netik Bero hodi ba sosa ai-han ruma. Maibé ba sira be la iha ona osan tenke liu foho leten hodi tun ba área Kampung-baru no Rai-kotu hodi hola nesesidade bázika ba konsume.

  Iha tempu ne’ebé ema hotu lakon esperansa, mosu lider Nasionál, Kay Rala Xanana Gusmão, hanesan fó esperansa ba ema tomak. Xanana hamutuk ho kompañia Wika hodi supa sai Bee iha lagoa Tasi-tolu.

“Agradese ba avó Nana, tanba Bee ne’ebé avó Nana ho kompañia uza mákina hodi supa hahú menus daudauk” Fausmino da Silva Gomes, agradese no hein ho esperansa tomak, bainhira mak Bee ne’e menus hodi nia bele hela fali iha nia uma.

Katastrofe ne’ebé mosu, nia neon laek. Hoban uma seidauk too. Sobu tan kanalizasaun Bee moos. Emar sira nia moris hetok susar tan, hanesan tutur naha todan, leva labele.

Vítima Anacleto Moniz, dehan, “situasaun ne’e halo komunidade tenke ba kuru bee moos iha fatin dook”.

Ho tempestade boot ne’e, komunidade barak tenki abandona hela fatin hodi refujia iha eskola bázika filial (EBF) 12 de Outubru, salaun kapela João Paulo segundu Tasi-tolu no fatin seluk ne’ebé seguru//

Hafoin be tun husi kuaze metru 20 ba metru 8, sidadaun balun fila ona ba sira nia uma hodi hamoos uma hodi hela fali.

Tuir dadus akumulativu husi governu, vítima mate ba inundasaun ne’e hamutuk 43. Mate isin balun too ohin loron seidauk hetan.

            Antes ne’e governu, liu husi konsellu ministru deside, membru governu tenke konsentra hotu ba problema kalamidade hodi rekupera vítima kalamidade nia saúde no infra-estrutura ne’ebé hetan estragus.

Esforsu ida ne’ebé governu da-ualu halo mak aprezenta ona orsamentu retifikativu ho montante millaun atus-rua-resin hodi rekupera problema kalamidade no covid-19 iha Timór-leste.

Reportajen : Julião Pinto (200421)

 

How do you react to this article?
Like
Love
Haha
Wow
Sad
Angry
You have reacted on "Udan-Ween Nakfila Sai Mata-Ween" A few seconds ago

Add to Comments Here!!!!

error: Content is protected !!