Vítima Inundasaun Hein Governu Nia Apoiu Emerjensia To’o Tanis

Dili – Vítima ida iha aldeia Kakeu-Laran, suku Becora, sente triste no tanis tanba dezastre natural ‘rai halai no inundasaun’ ne’ebé mosu iha loron 4 fulan Abril, estraga total nia uma no ai-han, maibé to’o oras ne’e seidauk hetan apoiu emerjensia ruma husi parte governu no organizasaun seluk ne’ebé apoiu vítima dezastre natural.
Vítima ho nia oan nain tolu oras ne’e hela iha viziñu nia uma tanba nia hela fatin estraga total, ora ne’e viziñu mak fó han no hemu.
“Ami salva an de’it, maibé ami nia sasan la salva, agora ami hein hela membru governu ida atu mai ajuda netik, maibé to’o agora ema la mai” vítima Lúcia Soares, konta ho matan-been.
Iha fatin hanesan, reprezentante vítima, aldeia kakeu laran, Hermenegildo de Fátima, husu ba Institu Jestaun Ekipamentu Pesado no Ministériu Obras Póblika atu “apoiu mákina hodi suru rai-henek no fatuk ne’ebé nakonu iha uma oin”.
“Tenke aranja lalais mákina ruma mai para hasai lalais rai-henek para komunidade bele hakmatek, agora ne’e sira hela la hakmatek” nia husu.
Xefe aldeia Kakeu-laran suku Becora, Ferlio Deodato, konfirma “ uma besik 300 mak hetan estragus, husi total ne’e, uma kain 50 mak estragus grave”, dadaun ne’e autoridade suku Becora kontinua identifika komunidade nia uma ne’eb’e hetan inundasaun atu hetan apoiu.
Reportajen : Quika Araujo (070421)







Add to Comments Here!!!!