JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Durante Serka Sanitaria, “Dala-Ruma Ami Sei Mate Tan Hamlaha”

Durante Serka Sanitaria, “Dala-Ruma Ami Sei Mate Tan Hamlaha”

Serka sanitaria ne’e halo ha’u labele halai karreta, “dala-ruma corona seidauk mai ami mate tanba hamlaha” família ki’ik ida nia lian halerik hasé ha’u nia tilun.

Maker ukun sira, deside serka sanitaria, iha Dili, liu husi konsellu-ministru, iha loron 8 fulan marsu to’o loron 15 no extende too loorn 2 fulan Abril 2021.

Serka sanitaria ne’e hanesan meius ida atu tulun médiku sira hodi identifika sidadaun ne’ebé sofre ba moras covid ne’e fasil liu tan.

“Konsellu ministru aprova manutensaun ba serka sanitaria iha munisipiu Dili to’o oras 23:59 loron 2 fulan Abril 2021” dehan  Ministru-Prezidénsia Konsellu Ministru, Fidelis Leite Magalhães, hafoin konsellu ministru,15/03/2021.

Serka sanitaria la fó biban ba sidadaun hodi sai husi nia hela fatin ba fatin seluk; hanesan meiu ida atu hakotu korrente  virus Corona iha sosiedade  tanba moras corona ne’e  neon la’ek la koñese ema riku ka kiak, ki’ik eh boot.

Funsionáriu públiku nia laran la taridu ba adi-han tanba sira nia bee-matan moris nian (saláriu) sei la maran hanesan traballadores iha komapañia privadu.

Ba traballadores iha kompañia privadu, Serka Sanitaria  mosu hanesan surik kro’at hodi ko’a-kotu sira nia fonte rendimentu.

Iha loron 25 fulan Marsu, iha serka sanitaria nia biban, ami la’o ba kapitál nia sikun.loron ne’ebá kalohan hamonu udan-been husi lalehan tutun. Ami halo viajen ida husi edifísiu Radio no Televizaun Timor-Leste iha  Caikoli, ba hasoru taxista ida iha área Tasi-tolu.

Durante viajen naruk, udan suviska habokon ami nia isin, hanesan natureza tanis ba povu ki’ik nia halerik ne’ebé rohan laek. Ha’u nia maluk tur iha hau nia kotuk, iha kuda-besi supra X ho marka 125. Ha’u nia belun dehan “udan halo ita malirin”.

Iha dalan ninin, matan ne’e haree loja no kios ki’ik maioria odamatan matan xave metin, roupa obralan iha dalan ninin Tasi-tolu nian mós falun metin, fatin hakmatek.

La’o minutu balun, ami to’o iha taxista nia uma hodi dada-lia kona-ba nia preokupasaun durante implementasaun Serka Sanitaria.

Husi hau nia tuur ne’e hau hatene ba uma kakuluk, ahi suar iha dapur hahú mihis no balun lakon, ahi matan balun hahú mate. Tanis hahú fera uma kakuluk, matanbeen hahú sulin, muron hahú deskreve terus.

“Durante serka sanitaria ne’e susar tebes atu hetan osan tanba kareta la halai, hau sente triste tebes” dehan taxista Verissímo Monteiro ho oin muron, Tasi-tolu 250321.

Serka sanitaria hanesan korrente boot, bobar povu balun nia ain, labele sai husi nia hela fatin ba fatin seluk hodi buka etu bikan ida. Povu ki’ik, tuur hodi hateke de’it husi hadak leet, hateke tuir karreta estadu  be halai ba mai iha Dili laran. Sira tilun rona de’it sirene nia lian, maibé susar ba sira atu sai husi knuuk

“Uma ida ami aluga mós ami seidauk bele selu, fulan rua ami seidauk bele selu, maibé uma na’in mós labele ezije tanba hatene hela situasaun” Verrísimo konta.

Ema husi munisípiu Ermera ne’e sente nia labele moris tan bainhira viziñu la apoiu ai-han, ta hahan ne’ebé kuran tebes ba sira, família han tuir deit nia kbiit la tuir gostu.

Bainhira kalan to’o, ema ne’ebé iha ai-han natón, sente kalan ne’e furak ba sira. Kalan nia nakukun nakfila sai ai-tarak ba sira be buat hotu-hotu kuran, sira taka matan iha tempu kalan maibé tilun nafatin rona oan sira nia halerik.

“Se viziñu la fo han ami, ami hein mate deit ona. Kalan toba mos la dukur tanba hanoin umalaran” dehan nia.

Iha tempu ne’ebé susar nia laran, família nain rua ne’e kaer metin nia sira juramentu ba maromak katak “sei la soe ó iha tempu di’ak no at nia laran to’o mate”.

Olandian Maria De Deus, nudár fen kaben,  nia nafatin hamaluk taxista ne’e hodi hulan todan no susar. Iha dada-lia ne’e nia koko subar nia muron,  maibé matan been nia sulin, deskreve moras tomak husi fuan.

Inan ba oan na’in rua ne’e dehan tan, hamlaha perigozu liu kompara ho moras korona tanba nia dehan “dala-ruma korona seidauk kona, ami mate uluk ona tanba hamlaha”. Nia sente moris ne’e sai namlele tanba la iha ona fonte rendimentu.

“Ha’u sente triste, ema nia oan sira han dosi ka paun ruma ha’u nia oan tanis maibé ha’u labele sosa fó nia, ha’u nia la’en la halai karreta ne’e osan la iha” Olandina konta hodi hamaus oan nia ulun.

Família ne’e hanesan hamriik iha nakukun laran, la hatene atu foti hakat ba loos ne’ebé  hodi hetan hahán hodi hatutan moris.

Família balun iha munisipiu hakarak tulun família ki’ik ne’e maibé susar tanba dalan husi munisipiu ba kapitál taka ho razaun serka sanitaria. família ne’e lakon ona neon, la hatene atu sadere tan ba se, atu lolo liman tan ba se bainhira fós ne’ebé ema ajuda.

“Família atu manda produtu lokál mai ami mós dalan taka hotu, sira mai labele, ami atu husu tan ba se loos” inan ba oan na’in rua ne’e dehan ho matanbeen.

Antes ne’e, governu halo esforsu oioin hodi tulun nia povu liuhosi fahe ai-han esensiál liu husi programa ‘sesta bázika’ maibé família ki’ik ne’e la hetan tanba naran la iha lista. Realidade ne’e halo moris hetok todan liu tan.

Serka sanitaria iha kapitál Dili hensan dalan ida atu kombate moras covid-19 iha Timor-Leste, maibé povu ki’ik sira nia halerik ba  ai-han mós rohan laek. Serka sanitaria hanesan korente boot, bobar sira nia ain-labele buka tan moris iha Serka Sanitaria.

Sei iha família ki’ik barak mak tanis ba ai-han iha kapitál Dili nia sikun maibé seidauk to’o ukun na’in sira nia tilun.

Reportajen : Redasaun Rádiu no Televizaun Timor-Leste (Rádio)

How do you react to this article?
Like
Love
Haha
Wow
Sad
Angry
You have reacted on "Durante Serka Sanitaria, “Dala-Ruma Ami Sei Mat..." A few seconds ago

Add to Comments Here!!!!

error: Content is protected !!