Pesoal PNTL Suspeita Tiru Sidadaun Nia Karau Iha Bobonaro

Bobonaro – Sidadaun iha suku Lahomea suspeita ‘deskonfia’ membru polísia Nasional Timor-Leste-PNTL munisípiu Bobonaru eskuadra Maliana ho inisial M.D.S  tiru mate sidadaun nia karau iha suku Lahomea área Lisai-Gruta.

Portavós komunidade suku Lahomea, Celino dos Santos, konta kronolojia akontesimentu  “membru polísia tiru mate komunidade nia karau, haruka labarik sira mak ba foti naan karau mak karau nain kaer labarik nain rua hodi husu tuir, maibé labarik sira dehan polísia ho inisial M.D.S maka tiru karau no haruka sira foti naan” dehan portavós, liu husi konferensia imprensa ne’ebé realiza iha sede suku Lahomea, 22/03.

Iha fatin hanesan, Sabino Laurindo, fó sasin katak  pesoál PNTL tiru mate beibeik komunidade nia animal hakiak maibé “ami la kaer ho liman” maibé iha akontesimentu ida agora “ami iha ona evidénsia forte”  tanba ne’e presiza prosesa pesoál PNTL ne’ebé tiru mate karau ne’e tuir prosesu legal.

Xefe suku Lahomea postu administrativu Maliana, Cirilio Mau Leto Lopes, ezize komandu PNTL atu “demite” nia membru ne’ebé pratika krime.

Sorin seluk, segundu komandante PNTL munisípiu Bobonaru, superintendente Antoninho Mau Luta konfirma, PNTL sei foti medidas balun tuir lei maibé sei hein prosesu imvestigasaun.

Entretantu, kazu tiru mate komunidade nia karau akontese iha loron 19 fulan Marsu, dadaun ne’e iha prosesu investigasaun hafoin submete ba Ministériu-públiku.

Reportazen : Humberto dos Santos (220321)

How do you react to this article?

You have reacted on "Pesoal PNTL Suspeita Tiru Sidadaun Nia Karau Ih..." A few seconds ago