Sidadaun Timor No Brazileiru Nain 118 Fila Ona Mai Timor Leste

Dili – Sidadaun Timor no Brazileiru nain atus ida sanulu resin ualu iha Indonezia, kuarta feira ne’e fila ona mai Timor Leste, liu husi fronteira terrestre motain.

Hafoin simu sidadaun hirak ne’e, ekipa COVID-19 ministériu saúde transporta kedas mai kapital Dili, hodi submete ba fatin karatina obrigatoriu ne’ebe estabelese husi governu.

Diretor jeral ba assuntu konsolares no protokolu, ministériu negosiu estranjeiru no koperasaun José Antonio Amorin Dias hateten, sidadaun hirak ne’e hela iha konsoladu Atambua besik fulan ida ona.

Tamba ne’e governu desidi lori fila sira mai Timor Leste, tamba virus Corona komesa alastra maka’as iha Atambua Indonezia.

Diretora jeral prestasaun saúde ministériu saúde, Odete Viegas hateten, sidadaun hirak ne’e sei transporta hotu ba hoteis ne’ebe governu prepara ona.

Diretor jeral servisu imigrasaun, superintendente assistente, Luis Barreto konfirma, tuir lista katak, iha sidadaun hamutuk nain 153, maibe iha deit sidadaun nain 118 mak tama mai Timor Leste.

Sidadaun hirak ne’e, kompostu husi Timor oan nain atus ida sanulu resin tolu no sidadaun brazileiru nain lima.

Entretantu, sidadaun hirak ne’e sei koloka iha hotel novu horizonte,  leokase, yq hotel, vila verde, inklui hotel sira seluk hodi kumpri karantina durante loron sanulu resin haat.

(Juvenal/Jp)

How do you react to this article?

You have reacted on "Sidadaun Timor No Brazileiru Nain 118 Fila Ona ..." A few seconds ago