JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Iha Ona Respostas Se Mak Sai Lideransa Diak Ba KI Periodu 2021-2025

Iha Ona Respostas Se Mak Sai Lideransa Diak Ba KI Periodu 2021-2025

Dili – Artigu neé, la reprejenta Instituisaun neébe haknaár áan ba, maibe nuúdar artigu pessoal hanesan Jornalista no sidadaun hodi espresa tuir Lei neébe vigor iha Konstituisaun RDTL, neébe durante neé observa situasaun Imprensa ninian iha Timor Leste.

Mandatu ba Konsellu Imprensa periodu dahuluk termina ona, no agora tama ona period da-ruak husi tinan 2021 toó 2025, iha neébe reprejenta sira neébe hetan nomeiasaun husi Asosiasaun Jornalista sira naín 2, Naín ba Kompaña Mídia naín 1, no Reprejenta husi Parlamentu Nasional ho Esperiensia Juridiku naín 1 no Komunikasaun Sosial naín 1, kompleta ona, no hein deit hetan pose, hodi halaó funsaun iha Konsellu Imprensa durante mandatu tinan 4.

Reprejenta sira nuúdar Konselleiru Konsellu Imprensa, hotu-hotu iha esperiensia Jornalismu la kestionavel. Konselleiru Sr. Virgilio Guterres (Lamukan/Babe) iha esperiensia Jornalismu hanesan Veteranus hotu; Konselleiru Sr. Francisco Simõens Belo mos nuneé, Konselleiru Otelio Ote, iha esperiensia Jornalismu desde tempu Indonezia kedan, Konselleiru Sr. Expedito Dias Ximenes, iha esperiensia Jornalismu hanesan mos iha Konselleiru sira seluk. Sira hotu-hotu iha kapasidade Lideransa neébe diak, tamba konsege lídera Instituisaun Estado sira iha area Komunikasaun nian, no kompaña Mídia sira.

Hau pesoal, apoiu konselleiru hirak neé; se deit bele lídera Konsellu Imprensa, tamba Hau rasik koñese no leé oituan sira ida-idak nia karakter líderansa, ho esperiensia servisu neébe kualidade, no la kestiona sira nia kapasidade.

Konsellu Imprensa, hanesan Instituisaun Independensia tuir artigu 2 Estatutu Konsellu Imprensa nian, iha Kapituu I kona-ba Dispozisaun Geral sira. Tamba neé Konsellu Imprensa tenke halaó nia knar ho Independensia, labele monu ba lasu polítika ka interesse partidaria nian, tamba koalia kona-ba Instituisaun Independente, Traballador ka Funsionáriu sira labele halaó knaár Professional Komunikasaun ho interese Partidu Polítika, liu-liu defende Partidu Polítika ida ninia filozofia, hodi minimiza Partidu seluk nia programa ka Lideransa nian. maibe situasaun hirak neé, dalaruma nakfilak tiha, tamba Funsionáriu ka Traballador balun hakat liu Artigu balun iha Konsellu Imprensa ninian, hodi koalia assuntus la ho Independente. Dalaruma sira presta ka dedika áan tinan barak ona iha Instituisaun Independente hanesan neé, signifika antes servisu iha Konsellu Imprensa, halaó knaár iha Instituisaun Partidaria nian. ida neé hatudu imajen la diak ba públiku, wainhira Traballador ida espresa ninia espresaun defende kor partidu ida hodi minimiza partidu seluk. Maske espresa nuúdar Liberdade Espresaun, maibe tenke ho professional, no labele hatudu malorek, nuneé públiku labele julga pessoal ida neé nian.

Durante neé públiku observa kona-ba servisu Konsellu Imprensa nian kona-ba Independensia. Observasaun neé atu asegura no mantein nafatin; Konsellu Imprensa ninia Traballador sira labele haliís ba Partidu Polítika ida ninia interesse, maske pessoal ida hanesan Militante no Simpatijante, ka kuadru legal Partidu ida nian, maibe presta ona ninia vída iha Instituisaun Independente, tenke hatudu professional, nuneé labele iha julgamentu husi públiku kona-ba dedikasaun ka servisu neébe halaó hela.

Fila hikas tópiku, Sé mak Lideransa Diak ba Konsellu Imprensa iha mandatu 2021 toó 2025? Hau pessoal, la kestiona konselleiru ida-idak nia kapasidade Lideransa, maibe Lideransa ba Konsellu Imprensa, tenke ema ida neébe Independente, labele arogante, labele egoismu, labele iha intensaun polítika, no firme nafatin iha kualker tempu hodi defende Komunikasaun, no promove nafatin Liberdade Imprensa, no konsidera Liberdade Espresaun sidadaun sira nian. Ida neé mak save importante ba Konselleiru sira, atu hili ka nomeia ida entre sira, sai Prezidente Konsellu Imprensa ba periodu tinan 4 mai tan.

Lideransa diak ba Konsellu Imprensa iha futuru, tuir Hau nia perspetiva mak hanesan;

a) Prezidente Konsellu Imprensa labele admite nia Traballador diskute assuntus polítika

b) Prezidente Konsellu Imprensa kontinua defende Liberdade Imprensa iha Timor Leste

c) Prezidente Konsellu Imprensa nia kooperasaun ho Jornalista labele kotu.

d) Prezidente Konsellu Imprensa tenke konsidera ema hotu-hotu nia Espresaun iha públiku

Maske públiku balun julga Traballador ka Funsionáriu Konsellu Imprensa tamba deit mete barak liu iha vída polítika ho karate espresaun deit, maibe Hau pessoal louva ba Ejistensia Konsellu Imprensa periodu dahuluk, halaó buat barak ba Imprensa Timor nian, maske sei iha buat balun neébe falta, maibe garante nafatin katak, kontinuasaun ba Programa, mandatu da-ruak bele kontinua nafatin.

Hau pessoal, prefere Lideransa ba Konsellu Imprensa periodu tinan 2021 toó 2025, mantein nafatin ho Lideransa antigu, maske iha krítika barak hasoru nia, maibe firme nafatin iha kualker tempu hodi fo solusaun ideal ba problema ruma neébe akontese, liu-liu hasoru Jornalista sira, husi Líder Polítika sira, akadémiku, Ativista no seluk tan. Tamba neé, lideransa Konsellu Imprensa, tenke ema neébe pronto iha kualker tempu atu hasoru Jornalista. Sr. Virgilio lamukan Guterres, ema neébe hatudu simplesidade ba Komunidade Mídia, liu-liu Jornalista sira, no ema neébe neutru tebes, fo liberdade ba ema hotu-hotu atu halo espresaun, bazeia ba Konstituisaun RDTL. Maske krítika Nia, nia rasik simu krítika no konsidera tebes, no fo solusaun. Ema neébe nonok, maibe sai ezemplar diak, no fahe nia matenek no esperiensia, ba se deit, wainhira presija ninia pensamentu. Maun Lamukan; ema neébe koriozu, motivador, no la karak matenek. Maun Lamukan; hanesan Fígura diak, hakuak ema hotu-hotu, nunka mais tarde defende Liberdade Imprensa.

Tamba neé, ita hotu-hotu iha esperansa neébe diak, mehi ba Lideransa Konsellu Imprensa tenke mai ho karater diak, hanesan maun Lamukan; neébe iha iha istória pasadu, komete barak iha vída Jurnalismu iha situasaun difisil ho nia maluk sira seluk, parese mos ho Konselleiru sira seluk neébe oras neé hamutuk iha mandatu da-ruak nian.

Istória Kómiku oituan ba Maun Lamukan. Bain-bain ema bolu Maun Gil boót. Dehan nuneé, Maun Gil boót nunka mais dukur atu defende buat ruma; maibe dukur hela deit kuandu tur mesak, la dada sigaru, satan kafe la iha. Hahahahah, Hau rasik mos dada lia ho Nia ona, no hetan mos mos iha fatin públiku; sempre hetan sigaru suar sai hela deit, liman kaer metin nafatin sikra kafe, atu tur ka hamrik; mak hirak neé la iha, dalaruma hamrik mos dukur; maibe nunka mais dukur ba Liberdade Imprensa no Liberdade Espresaun, tamba Nia rasik hatene, Demokrásia buras, hafoin Kafe no Sigaru mos buras bebeik iha fatin-fatin…….hahahhahahha !!!!

Maske Hau prefere ema ida nonok hanesan maun Lamukan; maibe ho vizaun neébe luan, la hakiduk passu ida, no la hakruuk ba ema ida nia influensia. Aliende neé, Hau rasik mos la minimiza Konselleiru sira seluk atu sai líder primeiru Konsellu Imprensa nian.

Sé mak sai Prezidente Konsellu Imprensa ba mandatu daruak, hakerek ona iha Lista ona, hanesan bain-bain ema dehan ho lian Malayu, “semuanya sudah tertulis dalam garis tangan seseorang, dan semua rencana indah sudah di siapkan oleh yang Maha Kuasa”, tamba neé, espresaun Hau nian hanesan ai-sasik, maibe sujestaun servisu administrativa, Hau tenke sita hanesan deskreve ona iha leten; ida neé prinsípiu Hau nian atu hatoó sujestaun ba malu, hodi hadia problema neébe ami observa iha liur, nuneé sai furak liu tan, wainhira ita servisu hamutuk; tamba atensaun ida neé hanesan servisu hamutuk ida, neébe haktuir iha artigu 11 kona-ba Devér Kolaborasaun nian, iha númeru 1 katak, Órgaun sira Komunikasaun Sosial no Jornalista sira tenke servisu hamutuk ho Konsellu Imprensa, liu-liu atu hetan informasaun no Dokumentu sira, bainhira servisu hamutuk neé presija dunik hodi halaó ninia knaár sira.

Tamba ida neé mak Hau hatoó sujestaun, hanesan haktuir iha artigu 11 Estatuta Konsellu Imprensa nian, tamba rekoñese nuúdar Jornalista, neébe servisu iha area Komunikasaun sosial ba imprensa ninian.

Konsellu Imprensa tenke implementa duni Artigu 13 kona-ba “Objetivu sira Atividade Konsellu Imprensa nian”, nuneé haburas Demokrásia iha País ida neé.

Obrigado no Agradese ba Konselleiru iha mandate dahuluk, no Parabéns ba Konselleiru mandatu da-ruak, espera katak servisu Konsellu Imprensa ba futuru sei sai diak liu tan, tuir programa neébe estabelese ona.

Viva Liberdade Imprensa no Liberdade Espresaun

Viva Jornalista Timor Leste

Hakerek Naín:

Amito Qonusere Araújo

Jornalista RTTL-EP

Númeru Kontaktu: +67077639282, E-mail : amitortl@gmail.com

How do you react to this article?
Like
Love
Haha
Wow
Sad
Angry
You have reacted on "Iha Ona Respostas Se Mak Sai Lideransa Diak Ba ..." A few seconds ago

Add to Comments Here!!!!

error: Content is protected !!