JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Periódu Serka Sanitária: Regras Covid-19 Vs Konflitus

Periódu Serka Sanitária: Regras Covid-19 Vs Konflitus

OPINIAUN ida neé la reprejenta instituisaun neébe haknaár áan ba, maibe nuúdar espresaun pesoal tuir liberdade espresaun.

Durante konfionamentu Obrigatóriu ka periodu aplikasaun serka sanitária iha kapital Dili tuir desizaun Konsellu Ministru Estraordináriu, tamba númeru Pozitivu Covid-19 aumenta, hafoin Governu aplika serka sanitária iha Munisipiu Covalima no Bobonaro. Durante periodu Aplikasaun Serka Sanitária no Estado Emerjensia, ho objetivu atu sidadaun hotu-hotu hakmatek iha uma, kumpri regras ba prevensaun Covid-19, no distansia sosial, nuúdar meius ida atu lutaa kontra Corona Vírus.

Wainhira ita koalia kona-ba Serka Sanitária ka Konfionamentu Obrigatóriu ba prevensaun Covid-19, signifika sidadaun hotu-hotu hakmatek iha uma, labele halibur hamutuk, evita aktividade kulturais, relijioza, suspende movimentu ba no mai, nuneé ekipa médiku no instituisaun relevantes sira, fasil kontrola ba sidadaun sira neébe afeta ka pozitivu covid-19.

Maske desizaun hatuúr iha regras Estado Emerjensia no Konfionamentu obrigatóriu ka serka Sanitária husi Governu, maibe Kapital Dili; hareé husi ókulu Jurnalismu hatudu, situasaun ka movimentu iha kapital Dili, lao hanesan bain-bain. Hareé husi perspektiva realistiku katak, Kapital Dili hanesan la iha kazu ida ka buat ruma kona; tamba movimentu lao hanesan bain-bain, la iha distansiamentu sosial, la fase liman bebeik, la uza maskára, no mais pior liu iha konflitus entre joven sira.

Husi realidade ida neé, hakerek naín hakarak hamosu perguntas ida, tamba sá mak durante periódu Estado Emerjensia no Konfionamentu Obrigatóriu ka serka Sanitária, sidadaun barak la fiar, la kumpri regras neébe Governu nuúdar Órgaun Estado ida, hatuúr tuir desizaun koletivu Konsellu Ministru?

Parese que ita hotu bele fo resposta adekuadu, tuir ókulu ida-idak nian, tamba ita labele muda realidade neébe akontese iha Kapital Dili, ka hafalun fali katak neé la loós.

Hakerek naín atu públika deit realidade neébe akontese durante aplikasaun serka sanitária, no Estado Emerjesia iha Kapital Dili;

1. Husi perspektiva pózitivu; Joven no estudante akadémiku, grupu Komunitáriu, komunidade voluntárismu, no Grupu emprezarial sira, fo apoiu solidariedade ba estudante sira neébe hela iha kapital Dili (Kost) hanesan nesesidade bázika; tamba kolega Estudante barak ai-han menus, tamba situasaun neébe akontese, liu-liu inan-aman, família sira la haruka ai-han maai kapital Dili, tamba provizoriu movimentu transporte rai maran, tasi no lalehan suspende.

2. Aktividade negósiu iha merkadu no aktividade supermerkadu sira kontinua loke. Fo espasu ba sidadan hotu atu aproveita halaó movimentu.

3. Aktividade jimnástiku kontinua lao, maske autoridade seguransa halaó kontrolu másimu.

4. Mais pior-liu, konfrontus kriminal kontinua akontese, durante periódu Aplikasaun serka sanitária.

Wainhira ita koalia kona-ba regras prevensaun Covid-19, iha periódu Aplikasaun Konfionamentu Obrigatóriu ka Serka Sanitária, aktus kriminal neébe akontese, mak aktus ida neébe la respeita, la obedese regras neébe deside husi Konsellu Ministru.

Atu konklui katak, hirak neé akontese, tamba hamosu persepsaun durante neé katak, kazu Pozitivu Covid-19 iha indikasaun polítika, iha interese polítika seluk, no afirmasaun seluk tan neébe halo sidadaun sira barak la fiar, no la konsidera regras Aplikasaun Serka Sanitária ninia implementasaun iha Kapital Dili, maske Sala Situasaun; Sentru Integradu Jestaun no Krize relata númeru afetadu Pozitivu Covid-19 aumenta bebeik kada loron.

Ho situasaun sira neé, Governu tenke foti medidas rígor hodi aplika ba sidadaun sira iha Kapital Dili, durante periódu Estado Emerjensia no Konfionamentu obrigatóriu ka Serka Sanitária, nuneé desizaun Governu tenke vale, se lae hatudu imajennla diak iha futuru, la iha referensia diak atu aprende no seluk taán.

Hakerek ida neé hafanun deit, tuir ókulu, laos ho peskiza sientiífika, tamba garante hela liberdade espresaun nuúdar sidadaun ida.

Tamba neé, hakerek naín rekomenda ba Autoridade seguransa atu:

1. Tenke foti medidas rígor bazeia b regras serka sanitária.

2. Halaó movimentu ka operasaun másimu iha bairo sira neébe identifika risku ba konflitus.

3. Halaó komunikasaun diak ho komunidade sira, nuúdar meius sosializasaun, ba prevensaun transmisaun Covid-19, no prevensaun ba konflitus, hodi garante paz no estabilidade iha komunidade nia leét.

4. Fo xamada ka bolu atensaun enkaregadu família ka inan-aman sira, atu kontrola oan ka membru família sira (joven) neébe lao iha tempu kalan, tenta kria konflitus ho joven sira seluk, ka hamosu provokasaun iha bairo laran.

Ho nuneé rekomenda ba joven sira hotu iha kapital Dili katak;

1. Tenke kontribui paz no estabilidade.

2. Tenke sai joven ba futuru nasaun nian.

3. Joven tenke sai ajente transformador ba prosesu Dezenvolvimentu Nasional.

Iha hakerek ida neé, rekomenda mos ba Governu;

1. Kria kondisaun hanesan formasaun profesional iha area oi-oin, ba kapasitasaun rekursus humanus.

2. Fasilita joven sira atu asesu aktividade desportiva.

3. Fo oportunidade ba Joven sira promove sira nia talentu no estudu kompprativu iha aktividade pintura, desportu, aktividade arte no kultura.

4. Halaó peskiza espesial ba nesesidade joven sira nian, liu-liu sira neébe involve iha aktividade arte marsiais no arte ritual, nuúdar tradisaun fanátiku joven sira nian.

5. Governu la dun sériu atu investe iha Dezemvolvimentu aktividade juventude nian husi nivel bairo toó nasional, maibe prioritija deit grupu balun balun.

La sala, iha tinan 2019, iha publikasaun informasaun iha kanal mídia RTTL, ONG sira neébe halaó peskiza kona-ba prevensaun konflitus relata, atu hamenus konflitus husi membru grupu arte marsiais no arte ritual, presija:

1. Reativa fila fali aktividade arte marsiais no arte ritual. Rajaun reativa nuneé fasil kontrola membru sira. Tamba aktividade arte marsiais no arte ritual taka, la iha ema atu kontrola, hafasil mosu provokasaun iha nivel bairo, tamba ida-idak defende áan katak, neé oknum. Ho situasaun neé, mak kontinua promove provokasaun, hod rejultadu mosu konflitus ho grau boót, ikus mai rejulta komunidade tenke sai vítima, joven lakon vída, no seluk taán.

Dala-ruma, ema ka grupu balun, uza força joven sira nian iha kualker situasaun, hodi buka benefísiu, wainhira objetivu atinji, joven sai termu ida hodi diskute no prega lia-fuan áat ba joven sira. Tamba neé Solusaun diak mak, hamutuk ita promove Paz no estabilidade, hodi kontribui ba Dezenvolvimentu Nasional.

Iha biban neé, Hau bolu no harohan ba Maromak, hamriík iha Foho Lulik Paicau Lospalos nia leten, bolu ba Foho Matebian nia lulik, no atu tatoli ba Foho Ramelau, atu hader, hodi bolu Saudozu Matebian Nicolau Lobato no Avo Xavi, atu fanun Matebian Saudozu Nino Conis santana, Saudozu David Alex Daitula, no Joven sira masakre 12 Novembru, atu hader hodi fanun nia aman Kay Rala Xanana Gusmão, Taur Matan Ruak, Francisco Guterres Lu-Olo, Lere Anan Timur, José Ramos Horta, Marí Alkatiri, atu hamutuk, lian ida deit, fuan ida deit, hodi hadomi nia joven mate restu sira, neébe lao namkari, se kroat ba malu, sei lia áat ba malu, hodi hafakar rán, sulin taán, habokon rai, haterus povo, haterus rai Timor Leste neébe ukun áan sosa ho ran, afora ho ruin.

Timor Leste, presija ita hotu nia kontribuisaun, ba Dezenvolvimentu Nasional. REMATA

Hakerek Naín:
Amito Qonusere Araújo, Jornalista RTTL, enderusu Praia-dos Ququeiros-Dili, númeru kontaktu 77639282 ka e-mail amitortl@gmail.com

How do you react to this article?
Like
Love
Haha
Wow
Sad
Angry
You have reacted on "Periódu Serka Sanitária: Regras Covid-19 Vs Kon..." A few seconds ago

Add to Comments Here!!!!

error: Content is protected !!