JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

La Putain Respectueuse !!!

La Putain Respectueuse !!!

Wainhira ita atu konta ema ida nia istória, neé responsabilidade boót ida, tamba sai lian ba lian laek sira, laos buat fasil ida. Maske ho simples konta istória liu husi profisaun, neé mak foin Diferensia boót iha neé tamba Difisil tebes. Ita leé tópiku ba artigu neé (La putain Respectueuse), iha hanoin sempre ho negativu, tamba ema normal, ninia hanoin ba buat seluk fali neébe doók husi realidade moris. Tamba dala-ruma istória neé halo ita hotu halo reflesaun ba ida-idak nia moris, dala-ruma leé istória neé toó mataweén monu, karik mataweén mamar.

Iha Fulan Marsu tinan 2019. Uma ida, ho simples, iha Sidade Dili, akumula ema hotu-hotu iha laran; feto no mane. Ema barak tama no sai, hahuú loron matan mosu nakfera iha dáder, toó nakukun hafalun iha kalan.

Movimentu tama no sai, hanesan kultura ida, ema barak waín, liu-liu Ugaju sira (lia-fuan Joven modernu nian), tamba fatin neé nunka mamuk. Hau rasik admira tebes, wainhira seidauk hakbesik no tama ba laran. Kuandu hareé husi doók, Hau hanoin iha mate uma, maibe buat neébe Hau hanoin la hanesan ho realidade neébe iha. Kuaze semana ba fulan, no fulan ba tinan, movimentu lao hanesan normal; Iha Hau nia hanoin, sá mak iha neéba? Neé hanesan perguntas boót ida? Maibe Hau labele hakat ba neéba, tamba Hau nunka mais atu koñese ema balun neébe halaó movimenta ba mai.

Altura neéba, Hau husu ba Hau nia áan, tamba saída mak movimentu neé nunka mais iha Labarik no feto, ka ferik sira, maibe iha deit Mane klosan, no katuas sira (tinan 40 toó 60 mak iha) neé perguntas ida ba Hau hodi hatene; no ida tan fali mak durante movimentu, sempre hare ema neébe ba-mai ho oin diferente.

Iha Hau nia hanoin, mosu perguntas barak-barak; Hau husu ba Hau nia áan rasik, bele ka lae, Hau ba observa sá mak iha neéba. Hau koko hakbesik áan ba, finje sosa akua (Weé hemu). Hau observa no hare, Hau nia mentalidade la toó, Hau deside áan la ba, no fila ba uma. Kuandu Hau toó uma, Hau husu nafatin ba Hau nia áan, loron ida, Hau tenke hakbesik áan ba fatin neéba, hodi hatene no koñese sá mak akontese. Hau penasaran atu hatene.

Iha sábado lorokraik, maijumenus tuku 5 ho balun, lorokraik atu ba kalan; Hau prepara áan atu ba fatin neé. Iha tuku 6 minutu 17, Hau toó duni iha dalan ida atu tama ba uma neébe ema tama no sai. Movimentu lao hanesan bain-bain. Iha tuku 6 liu minutu 40, ema ida ho Kareta mutin ho marka Land Cruiser, para iha Estrada ibun.

Joven ida; maijumenus tinan 28, Alturas, ho Tiu ida, parese tinan 50 resin (maibe ho kondisaun fíziku sei forsa). Tiu neé korenti kinur ida tara iha kakorok, taka hela ókulu metan iha nia matan, joven-oan neé mos taka ókulu iha matan. Sira naín rua tesik mai, Hanesan kultura haseé ema; Hau komprimenta sira, Boanoite; Tiu neé hatan, Boanoite, no ida Joven-oan neé senyum deit. Sira naín rua besik Hau, Tiu neé husu ona ba Joven-oan neé; Baino Ó lao uluk mak Hau tuir Ó, Joven-oan neé hatan; Diak sá, neé normal.

Depois ida neé sira naín rua lao tuir dalan hodi tama ba laran. Hau hateke sira naín rua; iha Hau nia hanoin, parese sira mos oin foun; entaun liu tiha minutu balun, Hau sosa sigaru ida neébe hau gosta (Marlboro mean masu ida) iha kios ida besik area neé. Hafoin ida neé, Hau loke Hau nia telephone, hareé óras, iha tuku 7 liu minutu 37, rai nakukun ona; ho fiar áan metin, Hau tama ba laran.

Iha tiha laran, hau nia matan hareé ona feto no mane, liu-liu Ugaju sira ho tinan 50 ba leten, balun ho tinan 30 ba leten mos iha. Tuir Hau nia predisaun, feto balun ho tinan 25 ba leten. Ita tama ba laran, feto sira haseé ita ho hamnasa, hanesan ita sae eskada Aviaun no forma iha banku atu simu osan. Hamnasa ho oin midar, maibe perguntas mak la hanesan; ho sae aviaun no forma iha Banku nian.

Ita kuandu sae aviaun, feto (pramugari) sira dehan, Bem-Vindo ka Selamat Datang ka Welcome hasoru ita ho hamnasa, nuneé mos hanesan iha Banku sira. Desde hareé oras iha tuku 7 liu munutu 37, entaun hau hatama telephone ba bolsu laran, iha tuku 10 liu minutu 41 laran hau iha Estrada boót ona, tamba mai tiha liur mak Hau hareé fali.

Entaun durante óras tolu ho balun nia laran, hau iha uma neé nia laran deit, halaó movimentu ba mai, fuma sigaru. Hau deskobre no hatene buat barak; saída mak akontese iha laran; Durante oras 3 ho balun; Hau konversa ho kolega mane balun kona-ba aktividade neébe akontese. Entaun rejultadu konversa, hau tenta hakbesik áan ba feto ida neébe tur mesak, dada hela sigaru LA akompaña mos ho Bintang lata ida. Hau komprimenta nia, Boanoite, Nia hatan Boanoite, depois Hau husu tan, Diak ka lae? Nia hatan Diak.

Hau hakarak ho ónestu deklara, ema neé Hau nunka mais koñese, no hasoru nia, hateten Hau nia naran loós, ho hakfodak…….!!! Hau dada íssss oituan, nia dehan tan fali, Ó (temi Hau nia naran) to, ho Ónestu, Hau hatan, SIM. Hau foin dehan SIM, nia hateten tan, Ó (temi Hau nia naran) servisu iha (Temi Instituisaun neébe Hau haknaár áan ba), Hau hatan SIM. Ho hamnasa, Nia dehan ba Hau, servisu imi nian, bele hatutan ami nia lian kona-ba terus no susar ba ema Estado atu rona hodi ajuda. Hau hatan kedan, se hakarak; entaun Hau bele dada-lia. Nia hatan, Ó (temi Hau nia naran) atu dada-lia kona-ba saída; Hau hatan, Hau bele dada-lia kona-ba aktividade neébe ita-boót halo iha uma neé. Entaun Nia hatan dehan “maibe Hau tauk ema koalia ita”.

Ho hau nia konsiensia no onestidade, hau hatan ba Nia; “se ita boót hakarak Hau dada-lia, ita boót nia naran, husi neébe, hela fatin, Hau sei la fo sai, no neé hanesan Segredu ba Hau”. Pois nia husu tan Hau, pois atu tau iha neébe? Hau dehan Hau hakerek ba artigu, fo sai iha Mídia Online. Entaun nia hatan ho laran kmaán, entaun bele.

Wainhira nia dehan ona bele, Hau re-afirma dala ida tan ba nia dehan; Hau sei la fo sai ó nia naran no hela fatin no mai husi neébe, maibe Hau fo sai deit saída mak durante neé Ó halo ka ó nia aktividade, hau fo sai deit ida neé, buat hotu kona-ba Ó nia identidade no rejidensia nuúdar Segredu. Nia hatan dehan BELE. Hafoin ida neé, Hau hasai Hau nia telephone, no komesa halo gravasaun, no husu perguntas ba Nia.

Maibe antes atu tama ba dada-lia kona-ba assuntus neé, hakarak atu dehan katak, iha livru ida Jean Paul Sartre ho lian França, kona-ba KATA-KATA neébe halo ona tradusaun ba lian Indonezia. Jean Paul Sartre hanesan ema Filósofu Eksistensialis ida husi França neébe koñesidu tebes, no hanesan mos Linguistika diak ida. Nia hakerek ona livru barak. Iha ninia livru ida neébe iha relevante ho artigu ida neé mak La Putain Respectueuse, ho signifika Borboleta Kalan ho Dignidade neébe públika iha tinan 1946 (Pelacur Terhormat 1946). Entaun hau koko atu artikula Rejultadu intervista Hau nian ba Livru Jean Paul Sartre nian, sai hanesan referensia ida, kona-ba situasaun neébe akontese.

Wainhira ita koalia kona-ba involvimentu iha aktividade prostituta, la sees husi intrepretasaun oi-oin husi sosiedade kona-ba stigma. Hau rasik sai sasin husi fontes informasaun kona-ba tópiku neé. Maske involve iha prátika aktividade direita Prostituta, maibe sei iha pensamentu rásiu, hodi ajuda no fo motivasaun ba Joven sira, liu-liu estudante sira neébe tenta atu hakbesik áan ba fatin nakukun hanesan neé. Tamba sá mak Hau dehan nuneé, tamba fontes informasaun neé, la gosta atu Joven no Estudante mane sira buka haksolok iha aktividade neé. Tuir Nia, joven no estudante sira tenke prioritija edukasaun, nuneé bele sai ema neé dignu iha família nia leét.

“ Husik ami mak hanesan neé ona, ba alin joven estudante mane sira, labele koko atu mai fatin hirak hanesan neé, tamba neé estraga mentalidade, psikolojia ba futuru nian”, Nia informa.

Mais pior liu, alin Feto sira neébe eskola, tenke ransu didiak, tamba ransu sala bele estraga futuru moris nian tomak. Ami neé moris nuneé ona, moral tuún, maibe ami tau áan, la arbiru. Ami halo ida neé, tamba nesesidade uma laran mak obriga, Nia reforsa.

Iha prosesu konversa nia laran, kuaze oras ida ho balun, Hau husu ninia mehi, ho matanweén, nakonu ho sentiment Edukativu, Nia konta katak, tamba sá mak Maromak labele bolu Hau sai servidor diak ba Nasaun. Hau presija tebes Maromak nia tulun. Maibe Maromak fo buat neébe Hau la espera, la buat ida, ida neé mos parte ida moris, maibe la signifika sai ema la diak, neé hanesan ezame de konsiensia, atu bele eduka Hau nia oan-sira, familia sira labele lao tuir dalan neé. Dalan neé todan, tamba neé tenke buka dalan diak, liu husi eskola, nuneé bele sai ema neébe iha dignidade.

“ Hau nia laen kaben lakon ona, no ba ona mundu seluk, Hau rasik tenke buka osan sustenta Hau nia família kiík neé. Hau iha responsabilidade atu eduka Hau nia oan-sira atu lao dalan Maromak nian, apoia sira ativa iha aktividade Relijioza, aktividade Edukasaun Naun-Formal, nuneé bele forma sira atu sidadaun neébe diak iha Família, sosiedade no Nasaun”, Nia konta ho mataweén, habokon hasan.

Se mak durante neé ita atende iha aktividade neé? Perguntas neé lansa ba nia, ho laran hakmatek, hateke ba leten hodi hateten “ durante neé ema barak mai, liu-liu maluk sira neébe iha osan, hanesan Emprezariu sira, sira neébe servisu iha Governu nian ”. Dalaruma Nia rejeita Estudante sira, maske aktividade neé la koñese kiík ka boót, riku ka kiak, maibe tamba konsiensia, Nia mak deside rasik, nuneé bandu involve estudante sira atu estraga mentalidade.

Ohin Hau hareé ita fuma sigaru no hemu Bintang Lata? “ Sim, Hau fuma no hemu. Maibe laos bebeik. Loron ida sigaru hau fuma lulun ida mos la hotu, mohu deit iha hau nia liman. Tua Bintang lata ida mos hemu la hotu, Hau soe. Hau lakohi estraga Hau nia saúde ”. Nia konta tuir.

Moris la seguru ona, involve iha aktividade prostituta, maibe kondisaun psikolojia sei diak tamba sei hanoin saúde. Tuir Nia, kuidadu saúde nafatin, nuneé bele tau matan nafatin ba oan-sira nia futuru. “ Wainhira Hau sai lanu-ten no hemu ten hanesan ho kolega sira seluk, Hau moras ruma, se mak Iha hau nia fatin hodi tau matan ba Hau nia oan-sira nia moris ”, Nia konta ho tanis.

Iha aktividade neé, buat ida úniku tebes, neébe nia konsege muda ema ida nia karakter no mentalidade atu labele involve iha aktividade prostitute neé, no obriga otas nurak neé forma ona uma kain; “ durante iha neé, Hau konsege koalia husi fuanba fuan, obriga alin feto ida, atu lalika involve iha aktividade nee. Foun-foun hau koalia, nia lakohi, maibe loron ba loron, hau esplika neneik, ikus mai, Maromak hatudu dalan, nia simu Hau nia motivasaun, entaun Nia deside áan sai ona husi fatin neé, no agora forma ona uma kain ”.

“ Iha sábado ida (2018), Nia ho nia laen hasoru Hau, ami rua koalia, Nia konversa ho hau ho tanis, no Nia dehan, se laos Mãe nia motivasaun, ohin loron Hau laos hanesan neé, parese Hau nia moris la iha naroman. Nia tanis loós, no hakuak hau hodi agradese maibe Hau dehan ba Nia, neé Maromak mak hatudu dalan, no Hau husu ba Nia atu kuidadu ho relasaun domin ho nia laen, nuneé labele iha problema”. Nia aumenta kona-ba buat neébe nia konsege feto seluk nia mentalidade.

Buat barak nia konta, la sees husi aktividade prostituta nian. Hau foti konkluzaun no rezumu espesífiku kona-ba istória neébe Nia konta. Hau empresta lia-fuan Immanuel Kant husi Prusia Leste kona-ba Direitu moral neébe moris iha sosiedade nia leét katak “Halo asaun ba tuir Ó nia konsiensia diak, nuneé Ó bele hetan respeita nuúdar Umanu, hanesan akontese ba Ó nia áan rasik ka ema seluk, laos dalaruma akontese, maibe bebeik toó Fim ”.

Ho esperiensia neébe ita rona liu-ba dadauk kona-ba involvimentu Feto ida, iha aktividade prostituta, ho rezumu Filozofia kona-ba moris no Toleransia maka; Kria ajenda ba buat neébe ita hatene, no kria ajenda ba buat neébe ita fiar, buka hatene fátor determinante kona-ba filozofia moris umanu nian. Termu folozofia neé, hanorin mai ita, atu hatene no koñese oinsa moris iha mundu neé.

Ema ida-idak iha ninia istória moris la hanesan iha mundu, inklui moris ida neé, sosiedade la gosta, toó Ukun Naín sira mos la gosta, hodi hamosu Lei sira hodi kriminaliza, maibe nuúdar Kriatura Maromak nian, simu situasaun saida deit mak akontese, ho fuan no laran. Iha pájina moris, ema ida-idak tenke rejista istória diak no áat neébe akontese, nuneé bele hatan iha Justisa Maromak nian, wainhira toó ona tempu Maromak bolu ita ba Nia kadunan Santo.

Ita fila-fali istória neé katak, Feto ida konta ninia aktividade, haktuir ho mataweén, la hatene ona atu konta istória barak, tamba Nia mataweén ho sentimentu triste mak domina ona ninia kakutak, hodi baralla total sá mak Nia atu espresa. Tamba buat neébe Nia konta, haktuir duni ho realidade, haktuir ho fuan katak, tenke simu desizaun neébe akontese, tamba Nia dehan “ Ó lakohi simu realidade, se loós mak atu hulan, tamba ema hotu-hotu iha ninia responsabilidade. Importante mak tenke kuidadu áan nafatin, ho dignidade”. Parese lia-fuan neébe Hau konta, ema barak sei fo merese ba Hau, maibe sira lahatene Hau nia kondisaun moris, sira la hatene sá mak Hau infrenta.

“ Hau simu ho pasiensia, Hau simu ho fuan, lia-fuan neébe viziñu sira bisu-bisu ba Hau, tamba Hau tama kalan boót ”. Hau halo ida neé, Laos atu buka kontenti no haksolok, maibe Hau la iha ona dalan seluk, Hau tenke halo ida neé, hodi oferese Hau nia vída tomak, maibe laos ho hamnasa, tanis iha fuan deit. Todan tebes, maibe tenke….tenke….tenke simu, ida neé mak moris iha mundu.

Buat neébe Nia halo, ninia membru família la hatene, inklui família tomak. Viziñu sira deskonfia nia, maibe ho onestidade iha fuan hatudu; neé laos deskonfia maibe realidade. Nia tenke simu no hasubar, tamba lakohi membru família naín 4 moe iha sosiedade nia leét, nia tenke subar metin no hateten ba sira “ Mama foin sai husi ser……(liafuan seidauk hotu, tanis tan) ”.

Ho dada-íis kleur oituan, 49 sekundus (besik minutu ida-Nia hamoós nia mataweén ho hena metan ida neébe kesi iha kakorok ba nia mataweén, nuneé kontinua espresa kona-ba neé”. “Loron-loron sempre nuneé. Hau toó uma, hau husu kedan ba naín 4 neé; ohin ba Reja ka lae? Ohin ba kursu ka lae? Keta haluhan Orasaun loron-loron”, perguntas motivasaun sai ajenda loron-loron hodi husu naín 4.

Antes toba kalan, sira naín 5 tenke reja, husu harohan ba Maromak kona-ba moris neé. Madrugada Nia tenke hader uluk hodi prepara sira nia matabixu, maibe antes prepara ai-han dáder nian, Nia hasae orasaun dáder nian, hafoin halaó servisu nuúdar inan ida servi oan. Dáder Nia tenke husu naín 4 ida-idak kona-ba aktividade loron ohin nian, no motiva tebes nia oan-sira, atu kontinua ativa involve iha aktividade Igrejam Formasaun.

Nia hateten “ Hau halo ida neé, keta Maromak tulun ami, liu husi sira naín 4, hadia netik ami nia moris. Mundu nadulas. Ohin ami iha nakukun, iha tarak nia leten, keta loron ruma hetan netik naroman, maske la naroman loós, pelumenus sira naín 4 aban-bainrua labele lao tuir dalan ida neé”.

Karik tempu mak bele muda fali ba tinan atus ida kotuk, Hau bele muda total moris neé, maibe labele, tamba neé Nia iha esperansa tinan atus ida mai, Ninia oan naín 4 nia jerasaun sei diak, tamba Maromak nunka taka matan ba ninia kriatura iha Mundu. Tamba neé termu rasiu haktuir, Bibi nunka buka nia naín, maibe Bibi Atan mak sempre buka nia bibi, maski bibi hatene nia luhan.

Perguntas simples ida neébe Hau husu ba nia. Fo ita boót nia lia-menon ruma ba jerasaun foun, liu-liu Labarik Foin Sae, Joven no Estudante sira kona-ba Preparasaun Futuru diak?

Nia hatan “ Hau husu ba alin, oan, estudante no Joven sira, hadomi Maromak, lao tuir dalan loós nian, hadomi Família no Hadomi áan rasik, tamba naran neébe foer, difisil tebes atu hamoós, maibe buat moós , minutu ida deit bele hafoer toó tinan atus ida. Futuru importante tebes, ransu malu ho atensaun, labele monu ba ema nia lasu, no tenke halaó orasaun barak. Ida neé mak Hau nia esperiensia katak, moris iha nakukun terus liu, tamba neé buat neébe importante mak hanesan ohin Hau dehan neé. Labele laos tuir ami nia dalan, tamba dalan neé la diak, husik toó iha ami deit”. Konta seidauk remata, mataweén turuk dadauk, la tahan ho sentiment triste neé, hakotu kedan ninia mensajen neé ….!!!

Istória barak, toó Hau nia fuan mos tanis, tamba lia-fuan mesak kroat hotu wainhira rona istória barak neébe Feto neé konta. Wainhira ami naín rua hakotu dada-lia moruk neé, Nia husu ba Hau, atu bele taka metin ninia naran, no save metin ninia imajen iha públiku, maibe halekar ninia istória ba ema barak kona-ba lalaok moris, atu ema hotu komprende loloós moris iha mundu neé oinsa.

Hafoin ida neé, Hau rasik promote atu rai segredu identidade ninian, tamba Kóde Étika Jornalista mos la admite atu públika ema ka fontes informasaun nia identidade wainhira Nia rasik la autoriza. Hau kuidadu tebes ida neé !!!. REMATA

Hakerek Naín:
Amito Qonusere Araújo
Jornalista RTTL-EP
Caicoli-Dili
Númeru kontaktu
+67077639282, E-mail amitortl@gmail.com

How do you react to this article?
Like
Love
Haha
Wow
Sad
Angry
You have reacted on "La Putain Respectueuse !!!" A few seconds ago

Add to Comments Here!!!!

error: Content is protected !!