JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

2021: Indonezia Lutu Dala Ida Taán Ho Insidente Aviaun Sriwijaya Air SJ182

2021: Indonezia Lutu Dala Ida Taán Ho Insidente Aviaun Sriwijaya Air SJ182

Hakerek ida neé, atu refleta ba insidente ida nebeé akontese husi Aviaun Sriwijjaya AirSJ182 rejulta Sidadaun Indonezia lakon vída, halo Kalohan hafurak iha matan, nakfilak sai nakukun no metan. Indonezia lutu dala ida taán. Inísiu tinan 2021, Indonezia hasoru kedan ho insidente ida nebeé ema hotu la espera, maibe ida neé mak realidade, tamba planu Maromak la iha ema ida atu satan.

Iha Sábado (09/01/2020), Aviaun Sriwijaya Air SJ182 nebeé lakon kontaktu Komunikasaun ho Ekipa torre kontrolu Aeroportu Internasional Sukarno-Hatta Jakarta katak, iha óras 14.36 Oras Indonezia, Aviaun Sriwijaya Air SJ182 Take Off, liu deit minute 1, Aviaun neé hakat ona 1.700 husi Rai maran, no halo komunikasaun ho Jakarta Approach, hafoin liu deit minute 3 Jakarta Approach hareé aviaun neé semo la tuir Rute bazeia ba pontu Koordenada. ATC iha Jakarta hateten ba Pilótu, maibe la toó minutu, Aviaun neé lakon nia isin lolon tomak.

Ho Insidente Aviaun Sriwijaya Air SJ182 nebeé lakon kontaktu Komunikasaun ho Ekipa torre iha Sábado (09/01/2020), konvida Mídia Internasional sira nia atensaun hodi halo publikasaun informasaun kona-ba kazu neé.

Mídia lokal Indonezia no utentes Mídia sosial hateten, kalohan nakfilak sai nakukun no metan ba Indonezia. Triste no mataweén hafalun Indonezia, wainhira Luta kontra Covid-19 seidauk toó Rohan. Hafoin sidadaun lakon vída iha loron leten ho Aviaun, Doútor espesialista sira nebeé luta ba nia sidadaun sira nebeé afeta Covid-19 mos tenke lakon vída iha Óspital sira iha territóriu Indonezia, inklui Vítima ba vírus neé. Maibe Luta seidauk remata, Aviaun Sriwijaya Air SJ182 hamout tan, sidadaun Indonezia nuúdar passajeiru ba aviaun neé, iha nebeé Nasaun barak hatoó sentidu Kondôlensia, no Mídia Internasional sira públika informasaun kona-ba insidente neé.

Mídia internasional balun hatoó sentimentu liu husi públikasaun, maibe iha parte seluk, mídia Internasional sira keé klean kona-ba insidente sira nebeé akontese durante neé, hodi relata kona-ba kualidade aviasaun Indonezia nian.

Mídia Alemaña Zeit online nia publikasaun kona-ba Seguransa Transporte Aéro iha Indonezia, halo Autoridade Regulador Uniaun Europeia (UE) no Estadus Unidus Amerika (EUA) konsege bandu Kompaña Aéro sira atu halaó operasaun ba Nasaun Osidental sira.

“ Hafoin insidente neé akontese, Uniaun Europeia revoga lisensa Operasaun Kompaña Aéro Indonezia desde 2007 toó 2018”, hakerek iha Zeit Online. Kontinua ba neé Zet Online hakerek mos kona-ba Autoridade Reguladora iha Estadus Unidus Amerika nebeé observa Seguransa Aviasaun iha Indonezia seidauk másimu desde tinan 2007 toó 2016.

Mídia South China Morning Post (SCMP) ho nia baze iha Hong Kong publika artigu ida hateten Indonezia hanesan Nasaun ida nebeé ho nia Industria Aéro Dezenvolvidu iha Mundu, “maibe iha dadus barak kona-ba seguransa la diak iha insidente Aéro durante neé”, tamba insidente Operasaun Aéro Garuda Indonezia 152 iha tinan 1997 monu iha Medan, Sumatera Norte, nebeé halakon ema naín 234 nia vída.

Nuneé Mídia SCMP neé mos diskute kona-ba insidente Operasaun Aéro seluk hanesan Aviaun AisAsia 8501 no Aviaun Lion Air 610.

Ho situasaun sira neé, oinsa Pozisaun Estado Timor Leste nian, nebeé halaó kontratu ho Kompaña Aéro Indonezia, durante neé halao operasaun Internasional entre Indonezia ho Timor Leste. Ho insidente hirak neé, toó oras neé Governu Timor Leste seidauk iha deklarasaun ofisial ruma, atu husu kuidadu sidadaun Timor-oan, nuúdar Passajeiru ho Aviaun Indonezia. Karik tamba Governu Timor Leste iha Relasaun Bilateral diak ho Governu Indonezia? Ou durante neé Timor Leste iha negósiu Ekónomiku, Infra-Estrutura Bázika no seluk tan ho Indonezia, tamba neé Governu Timor Leste lakohi mete problema Indonezia, liu-liu seguransa kompaña Aéro, ida neé sei Malahuk hela, sei Nakukun hela, maibe konsiente mos katak, Transporte Aéro Indonezia sai perguntas boót ba Komunidade Internasional.

Maske Mundu infrenta Pandemia Covid-19, Nasaun sira iha Rejiaun Azia, inklui Timor Leste, maibe polítika Governu husi kada Nasaun tau nafatin sériu ba assuntus seguransa ba ninia sidadaun sira.

Tuir loloós, Governu Timor Leste tenke fo ona atensaun ba nia sidadaun sira, nebeé halaó viajen Estranjeiru, transporta ho Aviaun Indonezia nian, antes no depois Pandemia Covid-19, kona-ba insidente Aviaun Indonezia durante neé. Parese Governu Timor Leste konsidera ida neé laos problema ba Timor, maibe iha ninia Efeitu ba futuru husi insidente Aviaun Indonezia iha loron leten ba Timor Leste, kuandu Luta hasoru Pandemia Covid-19 susesu.

Efeitu ba Timor Leste iha futuru, kuandu Governu Timor Leste kontinua kontrata komersial ho Kompaña Aéro Indonezia hanesan;

a) Passajeiru sira sei lakon isin lolon tomak ho Aviaun Indonezia nian kuandu la iha atensaun no antisipasaun.

b) Família passajeiru sira sei ejiji Kompaña Aéro no Estado RDTL nia responsabilidade wainhira mosu insidente nebeé la espera.

c) Ema barak sei trauma no tauk wainhira halaó viajen ba rai liur ho Aviaun Indonezia.

d) Sidadaun Timor-oan nuúdar passajeiru ba Aviaun Indonezia, sei tauk no trauka, tamba insidente barak akontese, ida neé sei hamate   mentalidade Timor-oan sira nian wainhira atu halaó viajen ba rai liur.

Impaktu ba sidadaun sira, ka sai passajeiru ba Aviaun sira, kuandu rona insidente Aviaun iha loron leten, wainhira atu halaó viajen ba rai liur hanesan, sente tauk no trauma, hafraku fuan kuandu aviaun Take off, mataween turuk kuandu Aviaun nakdoko iha loron leten, reja bebeik iha aviaun laran maske dalabarak la hasai orasaun iha rai maran, agradese minute ida ho balun deit ba Maromak kuandu aviaun tun ona iha Aeroportu.

Ho asituasaun nebeé Kompaña Aéro Indonezia infrenta, liu-liu insidente ba operasaun Aviaun, tuir mai Hau mos atu fo sai insidente nebeé akontese ba Aviaun Indonezia durante neé, hanesan tuir mai neé:

1. Tinan 1987
Iha Loron 4 fulan Abril: Aviaun Garuda Indonezia 035 Diresaun Banda Aceh ba Medan hetan insidente iha Aeroportu Polonia. Passajeiru naín 23 lakon vída no naín passajeiru naín 22 moris.

2. Tinan 1992
Iha loron 24 fulan Jullo: Aviaun Mandala Airlines 660 soke Foho Inahau wainhira atu tun (Desembarcou) iha Aeroportu Pattimura, Ambon. Passajeiru hamutuk naín 70 no Ekipa Pilótu no Krue lakon vída.

Iha loron 18 fulan Outubro: Aviaun Merpati Nusantaran Airlines 5601 Diresaun Semarang ba Bandung monu iha Foho Papandayan. Passajeiru naín 31 Ekipa Pilótu no Krue lakon vída.

3. Tinan 1994
Iha loron 10 fulan Novembru: Aviaun Merpati Nusantara Airlines 422 nia isin lolon tohar wainhira atu viajen iha Aeroportu Internasional Achmad Yani, Semarang, maibe la rejulta ema mate. Aviaun neé la uza total.

4. Tinan 1995
Iha loron 10 fulan Janeiro: Aviaun Merpati Nusantara Airlines 6715 Diresaun Bima ba Ruteng, monu besik Illa Flores. Passajeiru naín 10 no Krue aviaun naín 4 lakon vída.

5. Tinan 1996
Iha loron 13 fulan Juñu: Aviaun Garuda Indonezia 865 Diresaun Fukuoka-Japaun ba Jakarta. Hafoin Take Off, Aviaun neé haseés áan husi Pontu koordenada, rejulta aviaun ahi-han, passajeiru naín 257 no Ekipa Pilótu no Krue naín 3 lakon vída.

6. Tinan 1997
Iha loron 20 fulan Abril: Aviaun Merpati Air MZ 106 Diresaun Jakarta ba Tanjungpandan monu iha Suku Bulutumbang, Postu Tanjungpandan Munisipiu Belitung. Passajeiru naín 15 lakon vída husi total Passajeiru naín 48.

Iha loron 26 fulan Setembru: Aviaun Garuda Indonezia 152 Diresaun Jakarta ba Medan, monu iha Suku Buah Nabar, besik Medan, Sumatera Norte. Passajeiru naín 234 lakon vída.

Iha loron 19 fulan Dezembru: Aviaun SilkAir 185 Diresaun Jakarta ba Singapura, monu iha area Musi, Pelembang. Passajeiru naín 104 no Ekipa Pilótu no Krue lakon vída.

7. Tinan 2002
Iha loron 14 Fulan Janeiro: Aviaun Lion Air 386 Diresaun Aeroportu Sultan Syarif Kasim II Pekambaru-Riau ba Batam, atu semo no soke hafoin Take Off. Iha insidente neé la rejulta passajeiru lakon viída, maibe passajeiru naín 7 mak kanek todan.

Iha loron 16 fulan Janeiro: Aviaun Garuda Indonezia 421 Diresaun Mataram ba Yogyakarta Desembarcou emerjensia iha Aeroportu Bengawan Solo. Komisária (Pramugari) mak lakon vída, no Passajeiru naín 59 moris.

8. Tinan 2004
Iha loron 30 fulan Novembru: Aviaun Lior Air 538 Diresaun Jakarta ba Surakarta escorregar (tergelincir) iha Aeroportu Adisumarmo wainhira atu Desembarcou. Passajeiru naín 26 lakon vída no naín 142 kanek todan.

9. Tinan 2007
Iha loron 1 fulan Janeiro: Aviaun Adam Air 574 Diresaun Surabaya ba Manado, monu iha Area tasi Makassar ho klean metro Rihun rua (2000 m). Passajeiru naín 102 no Ekipa Pilótu no Krue lakon vída.

Iha loron 21 fulan Fevereiru: Aviaun Adam Air 172 Diresaun Jakarta ba Surabaya, iha nebeé Desembarcou iha Aeroportu Juanda ho emerjensia, hamosu aviaun neé nia isin lolon tohar. Maibe la rejulta ema mate.

Iha loron 7 fulan Marsu: Aviaun Garuda Indonezia 200 Diresaun Jakarta ba Yogyakarta escorregar (tergelincir) wainhira Desembarcou iha Aeroportu Adisucipto. Passajeiru naín 22 lakon vída no naín 118 moris.

10. Tinan 2008
Iha loronn 27 fulan Agustu: Aviaun Sriwijaya Air 62 Diresaun Jakarta ba Jambi escorregar (tergelincir) iha Aeroportu Sultan Thaha no soke sidadaun naín 3. La iha passajeiru ida mak mate maibe passajeiru naín 13 mak hetan kanek.

11. Tinan 2009
Iha loron 17 fulan Abril: Aviaun Mimika Air 514 Diresaun Mulia llaga, monu iha foho Gergaji, Papua. Ema naín 10 lakon vída iha insidente neé.

Iha loron 2 fulan Agustu: Aviaun Merpati Nusantara Airlines 9760 Diresaun Jayapura ba Oksibil soke Foho. Passajeiru naín 15 no Ekipa Pilótu no Krue lakon vída.

12. Tinan 2010
Iha loron 13 fulan Abril: Aviaun Merpati Nusantara Airlines 836 Diresaun Sorong ba Manokwari escorregar (tergelincir) wainhira atu Desembarcou iha Aeroportu Rendani. Passajeiru naín 109 moris hotu, maibe naín 44 mak hetan kanek.

13. Tinan 2011
Iha loron 7 fulan Maio: Aviaun merpati Nusantara Airlines 8968 monu iha tasi besik area Aeroportu Utarom, Kaimana Papua Oeste. Passajeiru naín 25 no Ekipa Pilótu no Krue lakon vída.

Iha loron 29 fulan Setembru: Aviaun Nusantara Buana Air 823 monu iha Aera Sumatera Norte. Passajeiru naín 18 no ekipa Pilótu no krue lakon vída.

14. Tinan 2013
Iha loron 13 fulan Abril: Aviaun Lion Air 904 escorregar (tergelincir) wainhira atu Desembarcou iha Aeroportu Ngura Rai Bali. Passajeiru naín 108 no ekipa Pilótu no Krue moris, maibe passajeiru naín 45 mak hetan kanek.

Iha loron 10 fulan Juñu: Aviaun Merpati Nusantara Airlines 6517 Diresaun Aeroportu Soa, Bajawa ba Aeroportu El Tari Kupaun, NTT hetan hard Landind wainhira atu Desembarcou. La iha passajeiru lakon vída. Maibe passajeiru naín 20 mak hetan kanek.

15. Tinan 2014
Iha loron 28 fulan Dezembru: Aviaun AirAsia QZ8501 Diresaun Surabaya ba Singapura transporta passajeiru naín 162. Hafoin neé iha loron 30 fulan Dezembru, ekipa Seguransa Marítima hetan Aviaun nia besi no kalen balun iha area Tasi Jawa, inklui mate isin husi passajeiru hirak neé, no la iha ida salva.

16. Tinan 2017
Iha loron 3 fulan Agustu: Aviaun Wings Air no Aviaun Lion Air soke malu iha Aeroportu Internasional Kualanamu, Deliserdang Sumetera Norte. Iha asidente neé, Aviaun rua nia liras hetan estragus, maibe la rejulta ema mate no kanek.

17. Tinan 2021
Iha loron 09 fulan Janeiro: Aviaun Sriwijaya Air SJ182 Diresaun Jakarta ba Pontianak monu iha area Illa Seribu area tasi Lancang no Laki, Jawa. Aviaun neé transporta passajeiru naín 62, inklui labarik naín 7, no bebe naín 3 inklui Pilótu no ekipa Krue naín 12 lakon vída.

Insidente nebeé akontese desde tinan 1987 toó agora, sai nuúdar referensia ka material ba Governu Timor Leste atu tetu ona, kontrata aviaun ho Kompaña Aéro Indonezia nian. realidade hatudu ona, Uniaun Europeia no Estadus Unidus Amerika foti ona desizaun hodi bandu Operasaun Aviaun husi Indonezia, ho rajaun insidente sira nebeé akontese.

Governu Timor Leste labele tarde, no seidauk tarde mos atu foti desizaun ruma, nuúdar nasaun Demokrátiku ida, hodi halo antisipasaun ba buat nebeé la espera atu akontese iha futuru, tamba asegura sidadaun nia seguransa moris importante liu. REMATA

Hakmatek iha Reinu Lalehan ba Ekipa Pilótu, komisária (Pramugari), no matebian sira nuúdar Passajeiru sira ho aviaun Sriwijaya Air SJ182, inklui Labarik naín 7 no Bebe naín 3.

Força nafatin mos ba família matebian ida-idak.

Hakerek Naín:
Amito Qonusere Araujo
Jornalista RTTL-EP, Caicoli Dili Timor Leste
Númeru Kontaktu +67077639282 / E-mail: amitortl@gmail.com

How do you react to this article?
Like
Love
Haha
Wow
Sad
Angry
You have reacted on "2021: Indonezia Lutu Dala Ida Taán Ho Insidente..." A few seconds ago

Add to Comments Here!!!!

error: Content is protected !!