JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Labarik Iha Foer Fatin Tibar Hetan Diskriminasaun

Labarik Iha Foer Fatin Tibar Hetan Diskriminasaun

“Dalaruma Loron ida ami la han. Ami kesi kabun. Maibe se sabraka iha, entaun ami han deit ida neé. Ami hili beé Aqua iha sampah laran mak hemu”, Moza, labarik ida nebeé hili lata mamuk iha Foer Fatin Tibar.

Hau nia artigu ida neé, nuúdar sasin ba situasuan nebeé Labarik Timor oan sira infrenta, liu-liu Labarik Timor oan nebeé halaó servisu. Tuir loloós seidauk tempu ba labarik sira atu halaó ida neé. No artigu ida neé laos atu hamonu dignidade Labarik sira nian, maibe atu hakerek realidade ida nebeé akontese iha Timor Leste, hodi proteje labarik sira nebeé la asesu ba Edukasaun, Saúde, maibe involve fali iha aktividade negósiu, liu-liu Traballu Infantil, nebeé afeta ba Labarik sira nia futuru.

Iha Konstituisaun RDTL Artigu 18 kona ba Protesaun ba labarik-oan sira, iha númeru 1 hateten; Labarik sira iha direitu ba protesaun espesiál husi família, komunidade, no mós estadu, liuliu hasoru hahalok hotu hanesan la tau-matan, diskriminasaun, violénsia, opresaun, abuzu seksuál no explorasaun, no númeru 2 hateten; Labarik sira hetan direitu hotu-hotu ne’ebé mundu rekoñese, hanesan direitu sira-ne’ebé hakerek ona iha konvensaun internasionál, ne’ebé estadu aprova no simu ona ka ratifika fila-fila.

Maske iha artigu 18 Konstituisaun RDTL koalia nuneé, maibe realidade protesaun ba Direitu Labarik la iha, no hamosu diskriminasaun ba Labarik sira. Tuir realidade nebeé iha, Labarik balun hetan diskriminasaun, tamba Labarik barak sei moris iha kondisaun vulneravel, liu-liu partisipa iha Traballu Infantil, nebeé afeta ba asesu Edukasaun, la asesu Saúde nebeé diak.

Iha Dáder-san, parese tuku 6 ho balun, ema hotu-hotu prepara matabixu, atu halaó aktividade loron ida nian. Labarik sira nebeé eskola, prepara ona kadernu no lapijeira, haris no matabixu atu hakat ba eskola. Servisu naín sira prepara sasan ofisiu nian, atu ba servisu. Nuneé mos, inan-aman nuúdar agrikultor, pepara katana, ensada, bote hodi prepara ba toós. Ida neé mak moris loron-loron ba ema hotu-hotu atu halaó nia aktividade, wainhira loron matan mosu, toó loron matan mout, atu ba kalan nian.

Prosesu moris iha mundu la hanesan. Balun haksolok no mataweén; balun iha kondisaun fíziku la hanesan; maibe ida neé mak kriatura Maromak nian. Buat balun, merese ema Úmanu mos bele responde, bele hadia, maibe ho karakter Egoista, fasil sai dífisil, dífisil sai konfuzaun.

Iha tuku sanolu dáder, Hau rasik ba Foer Fatin Tibar, atu hare ho matan; kona ba saída mak akontese iha nebaá. Durante neé sosiedade tomak koalia kona ba sidadaun sira nebeé halaó aktividade iha Foer Fatin Tibar. Hau sente laos buat foun, maibe tenke ba hare duni, sá mak akontese. Tamba neé, Hau deside hau nia áan, ho kolega naín rua (Operador Camara ho Motorista). Ami naín 3 ho kareta Mini-Bus RTTL-EP nian. Viajen husi Caicoli-Dili ba Tibar-Liquiça, lao besik oras ida. Ami toó iha Foer Fatin Tibar, ami tun atu halaó Intervista. Operador Camara foti imajen kona ba maluk sira nebeé hili lata, besi rohan iha Foer Fatin Tibar. Sasan sira neé konsidera nuúdar Lixu. Lixu sira neé, tula husi Dili, husi Empreza sira, husi Edifísiu boot sira, husi ema Riku sira; dalaruma ai-han nebeé prazu liu ona, mai fakar hotu iha Tibar.

Iha Foer Fatin Tibar, ita horon buat oi-oin; lalar barak mai hobur ita, maibe nunka atu hakiduk, tamba ho intensaun atu hakerek buat Lia Loós ida, nebé akontese, públika sai ba p’ubliku, nuneé ema hotu sente loloós oinsa moris iha terus laran. Iha Lixeira Tiba, ema sunu foer sira, ahi suar halo ita sente kalohan kiík hafalun, maibe ba nafatin tamba prinsipiu Jornalismu. Hau hakbesik áan, dadalia ho maluk sira nebeé hili sasan, sira balun hasoru ho hamnasa, balun subar áan husi Camara. Dalaruma sira tauk, tamba moe, ka rajaun seluk tan. Hau kontinua lao buka fontes seluk, nuneé bele halo intervista kona ba aktividade loron-loron nebeé sira halaó iha Foer Fatin Tibar. Oras lao dadaun, Hau nia servisu kontinua lao.

Teki-teki Hau nia matan tiru kedan ba Labarik feto, iha hela Lixu laran, hakruúk, no kaer hela ai-sanak kiík ida, ajuda nia liman, hodi hili lata mamuk, besi áat iha Lixu laran. Hau hakbesik áan ba nia, Hau bolu, ho oin midar, nia mai hasoru Hau. Hau dadalia ho Nia, husu atu halo intervista, Nia hatak Hau hakarak. Hau lao ho nia, lao metro sanolu resin, nuneé bele halo intervista. Ninia respostas ba Hau nia perguntas dahuluk, halo Hau sente imajina moris iha Mundu oinsa, no Hau imajina buat oi-oin, tamba Hau mos uluk moris iha situasaun servisu, maibe laos ho situasaun nebeé agora dadauk akontese, no Hau konsiente no refleta ba áan katak, ida neé mak moris iha Mundu; iha Hamnasa no iha Mataweén, iha terus no kontenti.

Moza, naran istimada, labarik ida tinan 9, loron-loron hahuú Segunda-Feira toó Sábado, pronto nafatin hodi mai Tibar-Liquica. Nia hela iha Tasi-tolu Dili. Iha tuku neén dáder, Moza ho nia alin kiík ida, Mina tinan 6, ho karon mamuk ida, mai Foer Fatin Tibar-Liquiça, hili lata mamuk, besi/Riti, nuneé bele ba tetu/faán, hodi hetan fali osan, atu sustenta ba nesesidade família.

Iha kapítulu III kona ba Direitu ba Edukasaun no Prinsipius kona ba Sistema Edukativu, tuir artigu 25 kona ba Direitu ba Edukasaun, iha númeru 1 hateten, Labarik iha Direitu ba Edukasaun ida ho kualidade, iha Respeitu ba Oportunidade hanesan. Hau hakarak klarífika katak, Lei neé fo dalan ba Labarik hotu-hotu atu asesu ba Edukasaun, maibe sosializasaun husi Ministériu Justisa, liu-liu Komisaun Nasional Direitu Labarik (KNDL) ba sosiedade tomak, liu-liu família ka inan-aman siira kona ba Kódigu ba Labarik. Sosializasaun neé ho objetivu atu fo atensaun ba sira, nuneé Inan-Aman ka Família iha responsabilidade ba labarik sira, atu apoiu labarik sira ba Asesu Edukasaun.

Tamba iha artigu 29 kona ba Direitus no Deveres Inan-Aman sira ka Reprejentantes Legais nian, iha aliña a hateten, asegura no ejiji ba sira atu kumpri dever ba frekuensia aulas nian no aktividades eskolares obrigatóriu, no aliña b hateten, partisipa ho ativu iha vida eskolar no iha prosesu edukativu hanesan mos promove kualidade ensinu nebeé diak liu.

Termus legais klaru ona, tamba inan-aman iha obrigatóriu atu ejiji labarik sira ba eskola. Maibe situasaun neé iha diferensia boot. Inan-Aman la ejiji, maibe fo tempu livre atu halaó servisu nuúdar Traballador Infantil. Situasaun ida neé mak hakotu future Labarik sira nian iha teritoriu Nasional, liu-liu iha Kapital Dili.

Ida neé mak akontese ba labarik ida ho naran Moza, hela iha Tasi-tolu Dili. Tuir loloós Moza ho tinan 9, iha Obrigasaun moral atu eskola. Maibe saida mak akontese, toó ona tinan 9, Moza la hatene leé no hakerek, dalaruma nia tinan mos nia haluhan. Nia hateten ba RTTL katak, Nia la eskola tamba kondisaun família la permite.

“Hau la eskola ida. Hau mai hili lata mamuk tamba osan la iha. Hau mai loron-loron. Ap-Ama mos la iha, tamba neé ami mai hili lata, atu ba tetu iha Comoro. Kilo ida 10 sent. Dalaruma fulan ida hetan 20 dollar hanesan neé. Osan neé fo hotu Apa-Ama, pois Apa-Ama hola hahan”, Moza konta iha Foer Fatin Tibar, Sábado (11/07/2020).

Iha kapitulu II kona ba Direitu Ba Saude No Ba Moris Diak, ho artigu 17 kona ba Direitu ba nivel moris nebeé sufisiente, iha númeru 1 hateten; Labarik hotu iha direitu ba nivel moris ida nebeé sufisiente, ho forma nebeé atu permite ba labarik ida-idak atu iha asesu ba nesesidades umanas bázikas hanesan ai-han, hela fatin, hatais, bé no saneamentu.

Maske nuneé, situasaun sira neé nakfilak hotu, la tuir regras Kódigu ba Labarik nebeé Estado adopta, tamba Labarik Timor oan sira barak abandona, la asesu ba nutrisaun nebeé nutritivu. Situasaun sira neé hamosu, labarik sira barak infrenta mal nutrisaun, no afeta ba Labarik sira nia koñesimentu. Ezemplu nebeé akontese, ba Labarik Moza, nebeé la asesu nutrisaun nebeé diak, maske Lei Kódigu ba Labarik fo dalan.

Moza hateten, dalaruma loron ida la han. Moza ho nia Alin garante deit ai-han no aifuan sira nebeé liu prazu, tula husi Dili mai, soe iha Foer Fatin Tibar. Sira hili ida neé hodi han, atu satan kabun, durante loron ida tomak. Maibe dalaruma mos la han.

“Dalaruma Loron ida ami la han. Ami kesi kabun. Maibe se sabraka iha, entaun ami han deit ida neé. Ami hili beé Aqua iha sampah laran mak hemu”, Moza, labarik ida nebeé hili lata mamuk iha Foer Fatin Tibar.

Maske kódigu ba Labarik Artigu 29 kona ba Direitus no Deveres Inan-Aman sira ka Reprejentantes Legais nian, maibe inan-aman ka família balun sei proteje nafatin labarik sira atu halaó servisu. Situasaun neé akontese tamba kondisaun ekonómia família la permite, nuneé haruka labarik sira atu halaó servisu. No parte ida eduka Labarik sira atu servisu, nuneé bele hatene oinsa kona ba terus, bele prepara áan ba future, wainhira forma família.

Laos la han deit mak Moza ho nia alin Mina infrenta iha Foer Fatin Tibar, maibe hetan mos diskriminasaun husi ema boót sira. Faktus hatudu, wainhira Jornalista RTTL-EP halo intervista labarik Moza ho nia alin. Komunidade balun iha Foer Fatin Tibar, hasai liafuan diskriminativu, atu impede labarik Moza ho nia alin, dadalia ho Jornalista, kona ba aktividade nebeé sira halo iha Foer Fatin Tibar.

Ho fuan boót, aten brani, pasiensia nebeé Moza ho nia alin iha, hakraik áan nafatin, maske hetan intimidasaun. Tuir loloós situasaun neé la merese atu akontese, tamba Lei Kódigu Labarik, ih artigu 11 kona ba Liberdade ba espresaun iha númeru 1 hateten; Labarik iha direitu ba liberdade espresaun, iha uma, eskola, instituisoens seluk no iha sosiedade, komprende mos direitu ne’e liberdade atu buka, simu no habelar informasoens no ideias oin-oin hotu, sei laiha konsiderasaun ba fronteiras, iha forma oral, hakerek, impresa ka artistika ka ho meiu seluk ruma tuir ninia hili.

Maibe sosiedade la iha koñesimentu, kona ba Liberdade Espresaun nebeé garante hela. Rajaun neé akontese, tamba la iha sosializasaun husi Komisaun Nasional Direitu Labarik kona ba Lei Kódigu ba Labarik, husi artigu ida ba ida.

Martinha Guterres, hela iha Caicoli hateten, labarik sira nebeé involve iha prátika iha traballu infantil tamba kondisaun ekonómia família la permite, no ida neé atu hakmaán todan nebeé inan-aman ka família hasoru durante neé. Tuir inan-aman katak, moris iha sidade Dili, infrenta problema oi-oin, tamba neé oan sira mos sai alternativu atu ajuda família nia nesesidade.

Maibe inan-aman no família balun la aseita Traballu Infantil tamba la fo oportunidade ba Labarik sira atu goja sira nia Liberdade, hodi asesu Edukasaun, Saúde nebeé Lei proteje hela. Germano dos Santos iha Comoro hateten, labarik sira tenke livre, atu bele estuda, halimar ho nia belun sira. Servisu nebeé labarik sira halo, hanesan diskriminasaun ida.

Ho preokupasaun sira neé, tuir intervista ida entre Rádio RTTL iha Kuarta-feira, loron loron 20 fulan Novembro tinan 2019, iha inagurasaun Iluminasaun ho Lampu Kor Azul hodi marka Aniversáriu Konvensaun Direitu Labarik iha Cristo Rei-Dili, Komisária Komisaun Nasional Direitu Labarik Dinorah Granadeiro hateten, Governu no Estado Timor Leste garante direitu ba labarik sira, tamba konsagra ona iha Konstituisaun RDTL iha artigu 18.

Nia hateten, Estado iha obrigasaun nakonu implementa ka valorize Direitu Labarik nian. tamba direitu labarik iha fundamental 4 hanesan; Direitu ba Sobrevivente, direitu ba Dezenvolvimentu, direitu ba protesaun no direitu ba partisipasaun. Direitu hat neé importartante atu bele fo biban, no fo espasu ba ita nia oan sira iha Timor Leste atu goza direitu moris nian.

“Tempu toó ona atu hareé Labarik sira nia Dezenvolvimentu. Fo liman ba malu hodi servisu makaás hodi bele fo duni espasu ba Labarik sira hotu atu goja direitu iha Estado neé”, Komisária neé afirma.

Maske promesas hirak neé koalia, maibe Labarik sira iha Timor Leste kontinua infrenta situasaun moris ho difisil tebes, nebeé la hanesan ho Lei hateten.

Relatóriu ida públika husi Ajensia Internasional UNICEF hateten, pursentu 13 ka labarik sira hamutuk 127.653 iha Timor-Leste hetan violasaun ba direitu, tamba tuir Konvensaun Direitu Labarik nian, nebeé Timor-Leste ratifika ona iha fulan Abril 2003 hateten, ema sira nebeé tama kategoria minoridade , tenke estuda , no labele halaó servisu ema boót hanesan fase kareta, hili foer, faán sasan, no aktividades ekonomika seluk tan.

Hakerek Naín: Amito Qonusere Araújo

Jornalista RTTL-EP, hela fatin Caicoli-Dili,

númeru Kontaktu +67077639282,

E-Mail: amitortl@gmail.com

How do you react to this article?
Like
Love
Haha
Wow
Sad
Angry
You have reacted on "Labarik Iha Foer Fatin Tibar Hetan Diskriminasaun" A few seconds ago

Add to Comments Here!!!!

error: Content is protected !!